Borsbeeld van Nefertiti | ||
![]() | ||
Beskrywing | ||
Materiaal | Kalksteen en pleisterkalk, oog van bergkristal | |
Hoogte | 47 cm | |
Ontdekking | ||
Datum ontdek | 6 Desember 1912 | |
Ontdek deur | Ludwig Borchardt | |
Plek ontdek | Tell el-Amarna, Egipte, huis P 47,2 | |
Kultuur | Nuwe Ryk, 18de dinastie, Amarna-periode | |
Tans in | Neues Museum, Berlyn, Duitsland |
Die Borsbeeld van Nefertiti, ook die Hoof van Nefertiti of net Nefertiti genoem, is een van die beduidendste kunsskatte van Ou Egipte en word as meesterwerk van die Amarna-tydperk en die beeldhoukuns beskou. Dit is in die regeringstyd van farao Echnaton tydens die 18de dinastie van die Nuwe Ryk tussen 1353 en 1336 v.C. as 'n model geskep.[1]
Die borsbeeld van koningin Nefertiti is op 6 Desember 1912 tydens argeologiese opgrawings van die Deutsche Orient-Gesellschaft (DOG) onder leiding van Ludwig Borchardt in Tell el-Amarna in huis P 47,2, die ateljee van die hoofbeeldhouer Thutmosis, ontdek. Die kunswerk is in Januarie 1913 volgens 'n ooreenkoms oor die verdeling van vondse en met die goedkeuring van die Egiptiese Raad van Antikwiteite na Duitsland geneem.
In 1920 is die borsbeeld saam met ander kunswerke, wat tot daardie tydstip as 'n permanente lening aan die Egiptiese afdeling van die Koninklik-Pruisiese Kunsversamelings gegee is, deur 'n skenking van James Simon aan die Vrystaat Pruise oorhandig. Dit is tans in besit van die Stiftung Preußischer Kulturbesitz (SPK, Stigting Pruisiese Kultuurbesit) en een van die hoofattraksies in die Egiptiese Museum te Berlyn wat sedert 16 Oktober 2009 weer in die noordvleuel van die Nuwe Museum gehuisves is.
Die waarde van Nefertiti se borsbeeld is deur 'n Amerikaanse assuransie op sowat 300 miljoen € (3,791 miljard ZAR) beraam.[2]